Cari castagni
I castagni
Perchè chì st'arburu hè un puntellu di tante culture paisane, è per tanti seculi, si pò parlà di a "civilisazione di u castagnu"
Castagniccia
In tutt'a Corsica, ma forse ancu di più in Orezza, ghjè più chè chjaru chì i castagni facenu parte di u nostru patrimoniu.
Per seculi, st'arburi putenti anu fattu parte di a vita d'ogni ghjorni in i paesi, è sò diventati puntelli culturali maiò.
Sin'à a metà di u XX° seculu, u manghjà, l'artigianatu, i paisaghji, ma ancu l'imaginariu giravanu intornu à u castagnu. Ghjè perchè chì e nostre leie sò prufonde, perchè chì i nostri destini sò mischjati, chì duvemu oghje intrattene i nostri arburi, curà li è rende li umaggiu.
A castagna in Corsica
Ghjè à partesi di u XII° seculu chì s'hè sviluppata a cultura di u castagnu in Corsica.
Sott'à u guvernu pisanu da u 1077 à u 1299, a nostr'isula ha cuminciatu à aduprà e techniche agricule di i Tuscani.Dop'à a Cunquista genuvese, à partesi di u XVI° seculu, a castaneicultura si sviluppa. Un'ordunanza di u 28 d'agostu 1548 impone ai pruprietarii di "piantà ogni annu quattru arburi fruttaghji -ficu, alivu, chjalzu è castagnu" ch'o sinnò c'era una multa di 3 lire per ogni arburu micca piantatu.
U 12 nuvembre 1619, un'antra ordunanza impone ai pruprietarii di piantà o mancu deci arburi. U 2 di dicembre 1626, l'urdine hè datu di suminà un centu di castagne in ogni circoscrizione nubiliaria do l'isula; i pianti chì venianu bè duvianu esse trapiantati in terreni favurevoli. Vint'anni dopu, un'ultima ordinanza di u 25 di ghjennaghju 1646 dà l'urdine di piantà deci castagni nanz'à a fine di u mese di maghju - è ghjera precisatu chì l'animali ùn li duvia tocca!
Ghjè in Cismonte chì i castagni trovanu e condizione e più favurevule à u so spannamentu, è i paisani n'apprufittanu pè tralascià e cereale, troppu custose è à spessu impurtate. Ghjè cusì chì u rughjone ha pigliatu u nome di Castagniccia.
Simu ghjunti à 35000 ettari castagnetu in Corsica, ma oghje seriamu piuttostu à 12000 ettari, è pare chì solu 1000 ettari sianu sfruttati. Ci vole à dì chì l'esodiu, e guerre, l'usine di tinture è a sucietà di consumazione anu tutti arricatu a so parte pè purtà a su tralasciu...
Oghje sò e malatie è u riscaldamentu climaticu chì minaccianu, ma forze ci n'hè sempre, è unipochi si movenu per dà un avvene à u castagnetu di Corsica. Lamentu di u Castagnu di Paoli di Tagliu a dicia digià à u principiu di u XX° seculu.
Oghje sò e malatie è u riscaldamentu climaticu chì minaccianu, ma forze ci n'hè sempre, è unipochi si movenu per dà un avvene à u castagnetu di Corsica.
Chestnut all over the world
A castagna hè colta in u mondu sanu. Ci n'hè trè razze sfarente
a castagna americana (Castanea Dentata), a castagna ghjappunese (Castanea Crenata) è a castagna europea (Castagna Sativa) si manghjanu è nutriscenu e so populazione dapoi seculi è seculi.
Un hè micca cusì cunnisciuta sta geugrafia di a castagna.A sapete voi chì a Francia ùn hè chè u 10° produttore mondiale di castagne incù 8000 tunnellate ? Assai dopu à a China (quasi 2 millioni di tunnellate), a Turchia (63000 tunnellate), a Curea Suttana (52000 tunnellate), l'Italia (52000 tunnellate dinù), a Grecia (63000 tunnellate), u Portugallu (30000 tunnellate), u Ghjappone ( 19000 tunnellate), a Spagna (18000 tunnellate), a Corea Suprana (face a paura di chjamà la cusì - ma face 12000 tunnellate)...
E di sicura, cume in Corsica, a castagna nutrisce i corpi ma dinù l'anima : face chì tanti populi l'hannu resu umaggiu. Ci sò l'haiku di u puetu ghjappunese Basho o e puesie indiavulate di u Cilenu Pablo Neruda... ci sò l'immuminature delicate di u Mediu Evu o ancu e nature morte di Chardin o Van Gogh... Ghjè quasi santa Castagna !
Puetica è pulitica di a castagna
Oghje, cercu à amparà à intrattene i mo castagni in paese.
Perchè chè ancu s'elli anu francatu i 300 anni, anu bisognu di cura ! E' ci danu cusì tantu in scambiu... Frutti bella sicura ma dinù fronde, tramula, ricci, suchjoni...
Tanta robba da aduprà è urdinà in u quadru d'attelli di landart nustrale per i zitelli... è i maiò !
Tant'ispirazione ch'anu purtatu i pueti è artisti di u mondu sanu à celebrà a castagna - a so bellezza è a so generosità.
Tante occasione oghje di pruvà à resiste à u lascià corre, à l'amnesia, à a morte di u castagnetu è di u modu di campà paisanu ch'ellu ha fattu nasce.
