A storia di castagnina
Quale simu ?
Castagnina, ghjè un prughjettu ch'aghju in capu da anni è anni...
![](https://castagnina.com/wp-content/uploads/sites/72/2023/10/VBL-Taddea-coiffees-1024x1001.jpg)
![](https://castagnina.com/wp-content/uploads/sites/72/2023/10/camaieu-ricci-871x1024.jpg)
Figliola di a Castagniccia
Sò cresciuta in Bastia, ma cume tanti Corsi, sò sempre assai liata à u mo paese.
Lontanu da u mare è da a cità, ghjè quì, in a Parata ch'aghju passatu tutt'e mo vacanze. À mezu à i castagneti, aghju sunniatu, marchjatu, scrittu. Speratu è persu sperenza per stu paese abbandunatu.
Per parechji anni, e castagne (è a Corsica sana) mi facianu nasce una spezia di nustalgia mischjata di tennerezza. E po' un ghjornu, aghju capitu è decisu chì tuttu què ùn era ancu da more, è chì ghjera dinù a mo responsabilità di pruvà à fà campà sta civilisazione di u castagnu in Corsica !
A putenza di u viaghju in Ghjappone
In u 2007, vale à dì più di 15 anni fà, sò stata calchi mesi in Ghjappone pè un prughjettu di ricerca.
Eramu di vaghjime, è ghjè cusì chì mi sò avvista quantu i Ghjappunesi sò scemi di castagne. Ci n'era dapperttuttu: robba da manghjà, ma dinù ughjetti chì pigliavanu a forma di a castagna pè dà un toccu di vita campagnola in città!
Dopu, aghju avutu bisognu di tempu per maturà u prughjettu, ma annu, m'hè parsu d'esse pronta, è hè nata Castagnina, a mo piccula casa d'edizione d'ughjetti Fatti in Corsica!
![](https://castagnina.com/wp-content/uploads/sites/72/2023/10/Taddea-cullana-1024x1024.jpg)
Una famiglia di creatori
Ci vole à dì chì st'ultimi tempi, aghju travagliatu assai ingiru à u design è à l'artigianatu corsu.
Assai mistieri fragili ma arradicati è carchi di valori, chì facenu travaglià inseme manu & ciarbellu, lochu è usi... Ancu se ùn sò capace di fabbricà da per me l'ughjetti, mi campu à immaghjinà li è à cuncepisce li incù l'aiutu di creatori attalentati.
Oghje, Castagnina hè digià una bella famiglia di creatori chì facenu campà a pruduzione lucale è u so paese. Ondeci per avà, ma di più dumane, se Diu u vole!